| STATEMENT: Ang tinuod nga SONA sa Kabukiran: Pagbaligya sa yuta ug katungod sa Lumad ilalom ni GMA |
|
|
|
| by Kalumaran | |
| Tuesday, 29 July 2008 15:48 | |
|
Hulyo 28. 2008
Ang Kusog sa Katawhang Lumad sa Mindanao o KALUMARAN nagatuo nga dugang bakak ang unod sa SONA karon ni Presidente Gloria Macapagal Arroyo susama sa niaging mga SONA. Dili na angay ikatingala nga mahimong peke ang mga unod sa SONA tungod kay siya mismo usa ka pekeng presidente. Ang kamatuoran nagkagrabe ang kawad-on hilabi na sa katawhang Lumad dinhi sa Mindanao tungod sa pagbaligya ni Gloria sa among yutang kabilin ngadto sa langyawng mamatigayon aron masulod ang pagmina, logging, agri-business ug uban pa. Tungod sa pag-ilog sa among yuta napasamot kini sa krisis sa pagkaon, pagkadaot sa kinaiyahan ug pagyatak sa katungod ug kagawasan sa atong nasud.Sa Medium Term Philippine Development Plan for Indigenous Peoples (MTPDP-IP) ni Arroyo, naghatag kini og kagawasan sa mga langyawng korporasyon aron mapahimuslan ang among yutang kabilin. Dunay 11 ka proyekto sa pagmina nga gitumbok dinhi sa Mindanao nga maoy moilog sa yuta sa Lumad. Lakip na dinhi ang Tampakan, South Cotabato; Pujada, Davao Oriental; Siocon, Zamboanga del Norte; ug uban pang munisipyo sa Compostela Valley ug Surigao del Norte. Kapin 100,000 ka ektarya ang langkob sa maong mga proyekto sa pagmina. Giduso usab ni Arroyo ang proyekto sa agribusiness nga maoy nagpapaspas sa kombersyon sa yutang gitamnan og humay ug mais, aron matamnan og saging, pinya, lubi ug tuba-tuba. Ang mga Lumadnong binhi sa palay, hinay-hinay usab nga nagkawala tungod sa kombersyon sa mga yutang kabilin. Ang direktang makabenepisyo niini ang mga langyaw ug dagkong kapitalista ug dili ang katawhang Lumad ug katawhang Pilipino. Anaa sab ang mga proyektong hydro-electric ug dam nga nagadaot sa mga kasapaan. Gimugna sab ni Arroyo ang Investment Defense Force kon IDF aron batokan ang nagkakusog nga protesta sa katawhan sa liberalisasyon sa mining industry. Gipakusog ang operasyon sama sa Oplan Bantay Laya II aron mapahawa ang mga Lumad sa teritoryo aron masudlan kini sa mga korporasyon sulod sa nahabiling mga tuig ni Arroyo. Tumong sa OBL 2 ang pagsiak sa katawhang Lumad ug mag-uuma, susama sa paggamit sa Mindanao Indigenous People’s Council for Peace and Development (MIPCPD ) nga gipangulohan ni Joel Unad ug uban pang mga tribal dealers, aron padayon sa pagpasubale sa interes sa mga langyaw. Tungod sa militarisasyon, nabutang sa peligro ang kinabuhi sa Lumad. Karong tuiga nahitabo ang mga grabeng pamakwet sa kapin 250 ka Matigsalug didto sa Compostela; 400 ka mga Mandaya sa Baganga ug Cateel, Davao Oriental; 100 ka Mansaka ug Mandaya sa New Bataan, Compostela Valley. Kaniadtong Nobyembre hangtud Disyembre 2007, kapin 2,000 ka mga Manobo ang namakwet sa Diatagon, Surigao del Sur, diin naapektuhan ang pang-eskwela sa mga kabataang Lumad ug panginabuhian sa gatusan ka mga pamilya. Nagkasamot ang kasuko sa katawhang Lumad kang Arroyo sa gihimo niyang pagtamak sa among katungod ug pagka-Lumad alang lang sa pagka-itoy niini sa mga langyaw’ng nasud. Bakak ang iyang gipanghambog nga kalambuoan tungod sa grabeng kawad-on ug kagubot sa among kinabuhi. Ang among singgit ngadto sa panggamhanan ni Arroyo, irespeto ang katungod sa katawhang Lumad sa yutang kabilin ug kaugalingong pagdumala; iduso ang tinuod nga repormang agraryo; ihunong ang mga operasyong militar sa bukid; ibasura ang mga balaod sama sa Mining Act of 1995; suportahan ang katawhang Lumad sa pagpalambo sa yutang kabilin ug matinud-anon nga pagdala sa serbisyo ngadto sa komunidad. Kini ang SONA sa katawhang Lumad dili ang pekeng SONA ni Arroyo karon. MABUHI ANG KATAWHANG LUMAD! MABUHI ANG KATAWHANG PILPINO! PADAYON SA PAKIGBISOG ALANG SA TINUOD NGA KAGAWASAN!] KUSOG SA KATAWHANG LUMAD SA MINDANAO (KALUMARAN) DULPHING OGAN MONICO CAYOG Secretary General Chairperson
Share this story through the following Social Media sites:            |
