TINGOG SA SUBA: Unsaon Pagpatay og Ihalas nga Mananap

Sayon ra man diay pagpatay og
ihalas nga mananap sa kalasangan
una,
ilogon hinay-hinay ang ilang gipuy-an o teritoryo
Pamutlon ang kakahuyan sa palibot
Patagon ang bakilid
sunugon ang kasagbotan
ug kuryentihan ang mga isda sa kasapaan
(pang pulotan)

 

Sunod,
usohon ang kagubot. Mag-pinusilay, mag-dinamita,
mga buto-buto maglanog-lanog sa palibot
aron mahadlok ug managan ang mga mananap
o di kaha mag-disco kada sabado
ang alingogngog maka-disturbo

 

Unya,
walay puas nga maglabay og bisan unsang hugaw –
plastic, botelya, lata, sako, papel, cigarilyo
maglutaw-lutaw o magtipundok
mahimong dakong basurahan
pasagdan, hangtud modaghan, modaghan
ang kalasangan mahimong garbage can

 

Pagkahuman,
pasangninlan mga mananap nagbuhat og krimen, trahedya
Gitukob ang bata, gibirahan ang kabaw
Busa kinahanglan dakpon, patyon o prisohon sa tangkal

 

ang pinaka-dako dalhon sa lungsud ug i-display
aron pistahan sa katawhan ug turista.
circus mala-mala
hmmmm… nia ra man diay daling pang-kwarta
burot bulsa

 

apan unsa bang pagka-unsaa
nga ang tangkal gi-landscape man morag sa plaza
Puwerting sosyala
wala ba diay sila ka-gets nga ang buaya
nagpuyo ilalom sa kalapokan ug nungka
ganahan magpakita sa katawhan

 

ikaw kunoy tan-awon, totukan, pikturan,
pistahan, tudlo-tudloon tibuok adlaw
di ba kaha ka hinay-hinay matunaw?

 

di ba kaha ka mahilis, magbagotbot
di ba kaha ka ma-stress, maglagot?

 

di ba kaha ka mingawon sa imong pamilya
ug mangita sa tinuod nimong pinuy-anan?
ganahan pa kaha ka mokaon ug di kaha
ka mag-niwang sa kaguol?

 

ug sa imong kaguol
di ba kaha ka masakit, mawad-an og gana
sa pag-pakabuhi ug pilion na lang
nga mo-evaporate sa earth?

 

o di ba, sayon ra pagpatay og wild animals
sa kalasangan? easy lang.

try it.

(MindaViews is the opinion section of MindaViews. Ramon Jorge B. Sarabosing is a writer and visual artist based in Butuan City.)

 

URL: http://www.mindanews.com/mindaviews/2013/02/21/tingog-sa-suba-unsaon-pagpatay-og-ihalas-nga-mananap/


Instagram #OurMindanao

Related Posts