BISAG UNSA: Buhok ni Maria

Kardo: “Pre, unsa man nang tanom diha sa imong tugkaran? Kanang nagkatay sa trelis, unya naay daghan kaayong morag buhok nga nagbitay?”

Berto: “Mao nay gitawag nila nga buhok ni Maria, Pre. Ambot, wala pa ko kahibalo unsay scientific name niana, pero nindot tan-awon, sa?”

Kardo: “Unsay nindot. Morag samokan man ko motan-aw.”

Berto: “Wala lang kay appreciation for beauty, Pre. Kay kanang mga buhok, sa pagkatinuod, mga gamot na sa tanom. Sa hangin nagtubo! Di ba na yunik? Makalingaw siya tan-awon, ilabi na tayhopon sa hangin.”

Kardo: “Imo na lang na, Pre. Kay ako, mga bulak sa tanom ang akong ganahan, dili ang mga buhok, aw, gamot. To each his own na lang gyod ta, sa Ingles pa.”

Berto: “Hahaha, nakahinumdom na hinuon ko kang Onyot, Pre.”

Kardo: “Ngano man, Pre?”

Berto: “Kini si Onyot, Pre, inis kaayo sa mga feeling shampoo model.”

Kardo: “Feeling shampoo model?”

Berto: “Kana gong mga babayeng tag-as buhok unya astag mga model sa shampoo. Hilas daw. Pero ako, Pre, ganahan kaayo sa mga babayeng tag-as ug shinampohan nga buhok. Guwapa tan-awon, humot pa gyod.”

Kardo: “Wa koy problema, Pre, kon pamatig shampoo model ang mga tag-as og buhok. Bahala silag madala sa advertisement sa mga shampoo. Ang akong problema, Pre, kanang mga buhok nga morag windshield wiper!”

Berto: “Buhok nga morag windshield wiper? Bag-ong tigmo na, Pre?”

Kardo. “Kana bang naa ka sulod sa jeep, unya ang katupad nimo taas og buhok, unya pagkusog sa hangin, ang iyang buhok magsigeg nusnos sa imong nawong!”

Berto: ”Hahaha. Gihimong windshield imong nawong!”

Kardo: “Kinsay dili maestorbo ana? Mga buhok nga mosulod sa imong mata, ilong, baba, dalunggan!”

Berto: “Bampira!”

Kardo: “Bampira? Unsay bampira?”

Berto: “Hadlok ka sa bampira. Di ba, mga buhok sa bampira ang mosulod sa atong mata, ilong…”

Kardo: “Yabag man ka, Pre, uy! Hyperbole ra tong ako. Motuo ba diay kag bampira? Ang akong gikabalak-an basig matakdan kog lusa, kuyamad, kuto, kaspa, kurikong, ketong…”

Berto: “Aw, imo lang gong badlongon ang imong katupad, Pre.”

Kardo: “Lagi. Ang kadaghanan mosabot ra man. Apologetic pa gani ang uban. Pero kausa nia na, Pre, nakatupad kog etudyanteng babaye. Paspas kaayo ang dagan sa jeep ug ang iyang buhok sigeg witik-witik sa akong nawong?! Dihang akong gibadlong, giingnan ko niya, politely, take note, nga magtaxi daw kon kon dili gustong maestorbo?”

Berto: “Brayt siya, Pre.”

Kardo: “Ako siyang gitubag, ‘Day, ikaw ang magtaxi aron dili makaestorbo ang imong buhok sa ubang pasahero. O kon di ka ka-afford og taxi sama nako, palihog kupti, hikti, kimpiti, bandanahi ang imong buhok kay nagtrespassing na sa akong nawong.’ Very polite sab ko niya, Pre.”

Berto: “Hahaha. Masungit nga tigwang. Pero kabalo ko nganong maka-atrak kag mga buhok.”

Kardo: “Ngano man?”

Berto: “Upaw na man god ka. Gustong mobalhin ang mga buhok ngadto sa imong ulo.”

Kardo: “Pagka yabag nimo, Pre, uy!”

Berto: “Joke only. Yabag man god ning atong estorya. Gikan sa tanom, miabot na man ta sa buhok sa mga shampoo model ug windshield wiper.”

Kardo: “Parehong topic man na. Buhok.”

Berto: “Na hala, buhok na kon buhok. Karon, tigtan-aw ka bag mga historical Korean telenobela? Kaobserba ka sa mga karaang Koreana? Puyde ba nimo maeksplikar nganong naglukdo na silag pagka dako ug pagka baga nga koronang ginama sa buhok?”

(Ang “Bisag Unsa” regular nga kolum ni Macario D. Tiu para sa MindaViews, ang seksyon sa opinyon sa MindaNews. Si Mac usa ka Palanca awardee ug National Book awardee. Puyde nimo ma-email si Mac sa mac_tiu@yahoo.com.ph)

URL: http://www.mindanews.com/mindaviews/2013/07/16/bisag-unsa-buhok-ni-maria/


Instagram #OurMindanao

Related Posts