TINGOG SA SUBA: Goodbye Ulan,Hello Sunshine

Human sa duha ka semana
daw ang kalibutan nahigmata
Si haring Adlaw ning-subang na
ulan ug dag-om mibiya na

kahayag ug init gikan sa langit
sa kalipay ang uban misinggit

nag-lumba og pang-hayhay
sa labhanan si nanay ug inday
wala na intawon sinina
nag-sige na lang og tago likod sa bintana

ang sala set, ibuwad aron di manimaho
apila pud ang sapatos nga baho-baho

ang kurtina nga gihimong tabon sa lamisa
waswasi pag-ayo
kay ang baho labad sa ulo

ang mga baktin
gibuhian na ug nag-dagan-dagan og tulin
nalipay ka’y wala na’y rain

ang tricykle gipa-andar kung modagan pa
magbagulbol mga bata magbaktas sa eskwela

ang balay intawon giayo og balik
gihiktan sa pisi, kinahanglan abtik

maayo gani wala maanod
nah, samot ang kalisod

ambot kung naa ba’y housing loan
mao ra gyud ni madaganan puhon.

URL: http://www.mindanews.com/mindaviews/2014/01/26/tingog-sa-suba-goodbye-ulanhello-sunshine/

Related Posts