HABAGATNONG HINAGAWHAW: Alindasay

Katulog nga minanok
bunga sa kahingawang mihamok
sa pangisip nga sa kalibog gisamok
sa kagahob sa lugaynong panaglabok.

Mga buot kuno sa lungsod ug nasod moalagad
nanag-indigay sa maanindot nga mga saad,
nagpalabwanay sa ilang kunong mga abilidad,
iyahayg angkon nga naghupot sa kaligdong ug integridad.

Mga managkaatbang ug ilang mga sakop
iyahay sab og pangubkob o pamutbot
aron sa isig-usa naay ikalabay nga lapok
sa walay pugong-pugong nga pagpangdaot.

Matag kampo iyahay og angkon
nga silay seguradong magmadaugon
ug isig bahad nga mag-pipol pawer ug magrebolusyon
kon lahi sa ilang panagna ang resulta sa eleksyon.

Taliwala ning init nga panagkarambola ug estokada
ubay-ubay nang managhigala ug gani managparyente pa
nga sa Facebook nag-isig unfriend o kaha block na,
ambot inighuman sa eleksyon magkauliay pa ba.

Sa kasamok niining maong panag-away-away
nga basin (simbako intawon) molungtad hangtod human sa piniliay
kinsa ba ang makatulog nga hinanok ug tawhay,
kinsa ba god ang dili mag-alindasay?

(Eric S.B. Libre is a Mindanawon freelance development consultant who has done some work in a number of conflict-affected areas of Mindanao and occasionally dabbles in creative writing. He lives in Digos City, and is proud to be a senior citizen.)