WebClick Tracer

HABAGATNONG HINAGAWHAW: Ginagmayng Kahibulongan

1

Okey ra man kuno
bahalag giunsa nila
pag-estorya ang ilang giestorya
kay nia man ta sa demokrasya
maong naay freedom of expression matag usa.

Pero nahibulong lang ko
nganong ilang tulisokon ug panghimaraoton man
ug kulang na lang nga sa pagpuspos tabangán
kadtong mga nahinaway sa ilang sinultihan –
ang freedom of expression diay asa na man?

2

Haskang tikasana diay anang mga tawhana
mga limbongan nga walay sama
kon tuohan ta ang kang Atorni nga estorya
kay grabe gyod ang paghawsiyaw nila
sa miaging eleksiyon nga resulta.

Apan alang kanakò pod kahibulongan
kon unsa kahâ ang posibleng hinungdan
nga sa ilang pagpanikas ang bise ra man
maoy gisigurong makalabaw sa iyang kaatbang
samtang ang ilang manok pagka presidente gipasagdan.

3

Ayaw intawon ko ninyog awaya
kay igò man lang ko nangutana
sa mga butang nga kanakò nakapatingala
kay dilì matugkad sa mubô kong pensada.

Eric S.B. Libre
12 Agosto 2018

Your perspective matters! Leave a comment below and let us know what you think. We welcome diverse viewpoints and encourage respectful discussions. Don't hesitate to share your ideas or engage with others.

Search MindaNews

Share this MindaNews story
[custom_social_share]
Send us Feedback