PANAW-LANTAW: Makoy ngadto kang Gloria, Imelda ngadto kang Mike. Ni Bro. Karl M. Gaspar

Maayo kaayo ang pagka-timing sa ilang mga pangalan, kung sa Iningles pa, nag-rhyme. Makoy ug Mike. Imelda ug Gloria. Baliktad lang ang ilang mga papel sa panggamhanan. Pero sa tinuod, gamhanan silang upat. Maayo sab mopahigayon sa ilang gahum; aron mabulahan ang kaugalingong kaliwatan og dili ang katawhan nga angay unta nilang alagaran.

Pastilan. Mubo ra diay kaayo ang 22 ka tuig aron mohandum og dakung kabag-ohan sa atong panggamhanan. Nag-People Power adtong 1986 kay ang katawhan napul-an na sa panggamhanang abusado, kurakot ug walay pagmahal sa katawhang nag-ilaid sa kalisod. Tama na! Sobra na! Palitan na! Mao toy kusog nga singgit nga nadunggan sa tibuok nasud.

Ngano daw wala may natun-an ang kaliwatang Macapagal-Arroyo nga igo ra ganing nipuli si Gloria sa lain pang Presidente nga gipalagpot sa katawhan? Wala ba nila masaksihi ang lintunganay'ng nahitabo kang Erap tungod sa iyang pangurakot ug sa pagpaningkamot nga tabonan ang kamatuoran?

Bright man unta ni silang Mike ug Gloria kay tag-as man kaayo'g na-angkon nga edukasyon sa labing inilang universidad sa nasud! Apan nganong wala sila kasabot sa unsay angay dili nila buhaton? Nanong wala matun-i ang mga leksyon gikan sa pamunuan ni Makoy ug Erap?

Wala ba say nakatudlo sa ila niining mosunod nga mga leksyon: Ang asawa o bana nga wala pilia sa katawhan, dili unta manghilabot sa dagan sa pamunuan! Dili na lang unta nila tugtan ang ilang mga anak nga mosawsaw sab sa pamolitika! Dili na lang unta sila mangitag mga daling maitoy-itoy nga mga empleyado ug ibutang sa tag-as nga mga posisyon sa gobyerno! Dili na lang unta sila mangawkaw sa panudlanan sa finansya sa nasud! Kung duna gani dili ganahan sa ilang pamunuan, dili unta nila gamiton ang militar ug pulis nga maoy mopahilom (labina sa paaging extra-judicial) aning mga buot lang mobarug sa kamatuoran ug hustisya!

Na, ulahi ra baya ang pagbasol. Tan-awa Gloria ug Mike: wala man god mo magtuon og tarung unsay angay'ng paagi sa pagdumala sa Estado. Morag nahulog nga naa kamo sa susamang kahimtang ni Makoy ug Imelda adtong panahon sa pagtumaw sa EDSA I.

Paminawa ang nagkakusog nga singgit sa kadalanan. Tama na! Sobra na! Kilos na! Wala pa hinooy klaro kung mag-People Power na sab. Kay dali bayang sabton nga gikapoy ang katawhan og people power. Tinuod, posible'ng lahi na sab nga People Power ang angay ipatumaw, kay basin ang niaging model ani dili na haum sa atong panahon karon. Mao may gisangyaw sa mga ka-obispohan ug mga manunulat sa peryodiko — mangita kuno ta'g lahi nga porma sa People Power.

Ang naka-apan lang aning conjugal corrupt Presidency ug tanang mga alipores nga nag-alirong kanila kay naa pa sila sa DENIAL MODE. Kung sa ato pa, dili pa nila mabasa ang pulso sa katawhan. Nagpaka-aron-ingnon gihapon sila ug buot ipakita sa tibuok nasud nga gamay ra ning problema ang mitumaw sukad nidaku ang kalayo gikan sa Hello Garci ngadto sa expose ni Jun Lozada.

Mga naa sa gahum: ayaw mog kahulog sa tentasyon nga maghuna-huna nga gamay ra ang katawhang Pinoy nga wala malipay sa inyo. Ayaw mog dali dali nga motoo anang ma itoy-itoy ninyong mga Tongressmen/women nga sigue'g ingon sa media nga ang taga-Manila ra maoy gapadayag sa ilang sinngit nga GMA Resign! Nagsugod na baya sab ang mga rali sa ubang mga siyudad sa nasud. Siyarog wala ninyo kini masuta taliwala sa nagkakusog karon nga protesta batok sa panggamhanang GMA.

Baliki ang mga nahitabo adtong 1986. Taas kaayo ang konfiansa ni Makoy ug Imelda nga magpabilin pa gihapon sila sa gahum. Nag-sigue'g pakigpulong si Makoy nga siya ra gayod ang nasayod unsaon pagpadagan sa nasud, siya ray hawod ug angay magpadayon siya isip Presidente! Siya ug ang iyang Cabinet, sigue'g pakita og show of unity. Sigue pa to sila'g hakot sa ilang mga loyalista aron ipakita nga duna pay nagmahal kanila (bisag klaro kaayo nganong duna pay niduol sa ila). Ang ilang mga anak sigue pa sab og pa-charming sa media. Sigue pa'g padayag ang militar nga nagkahiusa ug lig-on nga mibarug uban sa ilang commander-in-chief.

Niining miaging mga adlaw, kung sa pulong pa sa mga taga-Fransya, daw deja vu ang mga hulagway diha sa TV nga atong masud-ong. Kung sa ato pa, nakit-an na nato ang maong mga hulagway kaniadto pa ug karon daw nibalik na sab.

Mao na say gihimo ni GMA kaorn. Sugod na siya'g mga pakigpulong nga siya ra ang nasayod unsaon pagpadagan sa ekonomiya, siya ray hawod ug angay gyod niyang ipadayon ang iyang pagka-Presidente (gani klaro nga nasulod si Nograles isip Speaker kay nag-handum pa si GMA og charter change aron gamhanan pa gihapon siya human sa 2010). Nagsigue sila karon og pakita'g show of unity uban sa iyang mga Cabinet ug mga Tongressmen/women. Sugod na sab ang hakot ug hinatagay og kuarta ug benefisyo. Ang mga anak nga si Mikey ug Datu gapa-charming sab sa media, duyog defensa sa ilang Mommy ug Daddy. Ug ang labing taas nga naa sa katungdanan sa militar apil sab og padayag nga nagpaluyo sila sa ilang commander-in-chief!

Usa na lang gyod ang angay'ng mahitabo aron kumpleto na ang pagbalik sa EDSA I sa tuig 2008! Ang pagkahugno sa gamhanang conjugal corrupt Presidency sama sa pagpalagpot sa conjugal dictatorship adtong 1986.

(Ang MindaViews ang seksyon sa opinion sa MindaNews. Si Brother Karl Gaspar sa Redemptorist, manunulat sa mga libro, apil na ang "Mystic Wanderers in the Land of Perpetual Departures.")

Comments

comments