TINGOG MANDAYA: Analysis

Apan unsa man ang resulta sa eleksyon? Matud pa sa partial unofficial results nga gimugna sa NAMFREL ug sa uban pang mga telebisyon nga mas lamang gyud ang oposisyon, mas daghan ang nakasulod sa ilaha. Unsa kaha ang buot ipasabot niini? Ug unsa kaha ang atong mga analysis niini?

Segi ang tan-awon pinaagi sa mga kandidatong wala makakampanya tungod kay anaa sila sulod sa prisohan. Si Trillanes ug si Honasan kini sila ang mga kandidatong kung atong tan-awon wala gyud naka-adto sa nagkalain-laing lugar sa Pilipina aron mangampanya. Anaa sila sulod sa selda. Puro volunteers lang intawon ang ilang mga kauban ug walay makinarya. Apan bisan pa man sa ilang kahimtang lig-on silang mibarog ug misulti nga modagan gyud sila aron mapadayon ang ilang pagserbisyo sa katawhan. Sila kadtong mga lider sa pag-alsa batok sa panggamhanang Gloria Makapagal-Arroyo. Gipreso kay natay-og man si Presidente Arroyo.

Miabot ang eleksyon, wala sila nagpabara sa mga bongbong sa selda nga nakaharang sa ilang gipakigbisugan. Mirehistro isip mga kandidato. Wala makakampanya tungod sa sitwasyon. Apan sa dihang miabot ang adlaw sa paghukom nakita nga ang katawhan mipili sa ilaha. Unsa man ang implikasyon niini sa panggamhanang Arroyo? Dako ang implikasyon niini tungod kay pinaagi sa ilang boto gipakita sa katawhan nga aduna silay aligutgot sa kasamtangang panggamhanan. Ang ilang kasuko gipakita nila sa usa ka boto. Ug kinahanglan hinuplugan kini sa panggamhanang Arroyo.

Daghan sa Genuine Opposition ang nasulod sa magic 12. Angayang mamalandong si Presidente Arroyo niini. Kinahanglang nga sensitibo siya sa mga boto sa katawhan ug ang ilang gusto nga ipaabot sa kasamtangang adiministrasyon. Tan-awon niya kung unsa man buot ipasabot luyo sa mga numero tungod kay aduna kini gusto nga ipadayag ngadto kaniya.

Walay mga artista nga namayagpag sa senado, Si Cesar Montano ug si Richard Gomez wala makasulod. Sa General Santos si Mani Paquiao wala usab midaug. Ug and Gabriela ug Bayan Muna nagadula sa permiro ug ikaduha nga bahin. Basi sa mga resulta nga atong nakita, kini nagpasabot lamang nga ang kahimatngon sa katawhan nagkataas na kay bisan pa man nga gipangpatay ang mga lideres sa Bayan-Muna wala gihapon nagpatinag ug wala nahadlok ang katawhan. Mihatag gihapon sila sa ilang boto niining mga grupoha.

Nasayod kita ang kasagarang nagadula sa magic 12 mao kadtong mga kandidatong giipit sa kasamtangang administrasyon. Apan ang katawhan ang naghukom. Angayan nga kahadlukan kini sa administrasyon.

Dili lamang angayan silang mahadlok apan kinahanglan pud silang mokurog. Apan angayan nga vigilante pa ang katawhan tungod kay aduna pay resulta nga gikan sa Maguindanao diin pwede pa sila nga molaro niini. Hinumduman nato nga ang kwarta mosulti gyud. Padayon kita nga magmatyag aron maseguro ang atong boto. (Ang MindaViews ang seksyon sa opinyon sa MindaNews. Si Jelieta E. Mariveles-Ruca, 37, bag-o lang migradwar sa iyang PhD sa University of Southeastern Philippines. Aktibo siya sa Gabriela ug sa Alliance for Concerned Teachers.)

Comments

comments