TINGOG MANDAYA: Tubig

Tubig nga diin nagatatag kanato sa kinabuhi, tiaw mo gud nang ang mga nagahunger strike, tubig man ang nagasustini sa ila aron mopadayon nga baskog. Ang tubig usa ka importanteng bahandi nga diin gihatag kanato sa kahitas-an. Walay nanag-iya sa tubig. Gasa kini gikan sa kahitas-an.

Susama sa Dakbayan sa Dabaw bug-os nga gigasahan kini sa kahitas-an sa pinakamaayo, limpyo, ug lami nga tubig sa tibuok Pilipinas, mao gani nga number kini sa atong nasud. Sa tibuok kalibutan ikaduha ang tubig sa dakbayan sa Dabaw ug numero uno ang tubig sa Netherlands.

Dinhi sa Dakbayan sa Dabaw ang tubig gipangalagaan sa Davao City Water District. Usa ka ahensya sa goberno nga maoy nagadumala sa pag-atiman sa tubig nga gikinahanglan sa katawhan. Usa ka serbisyo-sosyal nga diin angayang ihatag sa panggamhanan. Apan, unsa man ang nagakahitabong kasikas sa DCWD karon? Diin gipaluyuhan sa lima ka Board of Directors ang tanang lihok nga nagahitabo dinhi ug ang tanang mga laraw ug lakang giplanonhan kini sa BOD.

Sa bag-ohay lamang ang lime ka BODs nagaplano nga moloan og P100 milyon aron kuno sa pag-ilis sa mga tubo nga karaan na. Matud pa sa NAMADACWAD kung ang ingon niining nga tumong dili kini bangi apan ang paghulam o loan og P100 milyon usa ka mga lakang nga sayop tungod kay adunay pundo nga mokabat sa P360 milyon nga ana karon sa DCWD. Sa ingon niini nga sitwasyon walay rason ang pagloan sa BODs a P100 milyon.

Kung atong tukion base sa kasaysayan ang BODs sa DCWD dili lamang kausa nga mibuhat sa ingon niining mga lakang kung dili aduna silay mga plano niadto pa nga magloan sa LUWA kon Local Utility Water Administration. Kini ang ikatulo nga lalkang sa mga BODs nga moloan bisan basi sa kahimtang nga adunay pundo ang DCWD. Apan napakgang kining mga plano tungod kay natuki sa NAMADACWAD nga sa panahong nagaplano sila sa pagloan adunay dakung pundo ang DCWD nga diin usa kini ka proeba nga dili gyud angayang moloan ka yang kwarta pwede mao kini ang gamiton. Ang duha ka hugna sa plano sa pagloan sa BODs wala magmalampuson tungod kay nababagan kini sa katawhan inubanan sa union nga ana sa sulod sa maong ahensya.

Karon aduna na usay mga plano ang BODs sa DCWD nga moloan busa gikinahanglan na usab ang panaghiusa sa katawhan aron mapugngan ang maong mga laraw, kini matud pa sa Consumers Watch.

Karon kung pasagdan nato ang mga laraw sa BODs klaro kini nga makaduot sa DCWD ngadto sa pagkaunlod sa utang.

Ang kasaysayan sa Pilipinas usa ka buhing panag-ingnan nga diin humot kining gipaloan sa International Monetary Fund – World Bank o IMF-WB. Apan kung atong pangatun-an ang Pilipinas mas miunlod pa gyud kini sa iyang segi og pangpangutang. Ug dili halayo nga ang nahitabo sa Pilipinas mahitabo usab sa DCWD tungod kay ang pinansya gikan sa LUWA gikan man usab sa IMF-WB. Usa usab kini sa mga premerong lakang sa pribitisasyon sa DCWD.

Matud pa ang kasaysayan mao ang labing nindot ug maayo kaayo nga magtutudlo hinaut makatuon dinhi ang mga BODs sa DCWD. Hoy lihok mo para sa kaayuhan sa katawhan!

(Ang MindaViews ang seksyon sa opinyon sa MindaNews. Si Jelieta E. Mariveles-Ruca bag-o lang migradwar sa iyang PhD sa University of Southeastern Philippines. Aktibo siya sa Gabriela ug sa Alliance for Concerned Teachers.)

 

 

 

Comments

comments