TINGOG MANDAYA: Unsa kaha? Ni Jelieta E. Mariveles-Ruca

Ang mga taga Medya mao kini ang nagapaabot kanato sa aktuwal nga mga panghitabo gikan sa sulod mismo sa lugar nga diin adunay nagapanghitabo. Sila kadtong andam usab nga motaan sa ilang kinabuhi aron lang gyud mahatod sa habagang duot sa katawhan ang lab-as nga mga balita. Kung atong tan-awon susama usab sila sa mga sundalo andam kanunay sa bisan unsay mahitabo.

Tataw ug klaro gyud nga ilang nakuha ang mga panghitabo diin tua si Trillianes, si General Lim, Fr. Reyes, ug ang usa ka Obispo, kanhing Bise Presidente Teofisto Guingona ug uban pa. Ila usab nga nahiaguman ang makatulo sa luha nga "tear gas". Nasaksihan gyud nila sa akto ang nahitabo sa Manila Peninsula. Nakuhaa nila ang mga demand sa grupo ni Senador Trillanes. Patalsikon ang presidente tungod kay nakapasamot kini sa problema sa Pilipinas, Patalsikon ang presidente tungod
berdugo kini sa katawhan, patalsikon kini tungod kay kini ang hinungdan sa pagpamatay sa linya sa medya, sa simbahan, peace advocates ug uban pa. Mao kini ang mga demand sa grupo ni Senador Trillanes.

Apan unsay nahitabo sa mga medya nga naningkamot lamang sa nga mabuhat nila ang ilang trabaho? Gipusasan, ug giuban sa pagbanlud sa bilangguan. Gidala sila didto apil sa Bicutan. Daghan ang nabanlud sa bilangguan. Tama ba kini? Tama ba ang gibuhat sa mga itoy ni Pangulong Gloria Macapagal Arroyo?

Ang pagbanlud sa mga taga Medya sa sulod sa bilangguan usa ka timailhan nga ang panggamhanan Aryoyo daku ang kahadlok nga mabutyag ang mga mulo sa katawhan. Hadlok siya nga mabulgar kini sa tibuok kalibutan. Hadlok tungod kay ang gibutyag nila ni Trillanes ang iyang mga anumalya. Hadluk siya tungod kay pwede kini mopokaw sa nagdilaab nga kasuko sa katawhan.

Unsa kaha kung walay medya nga magbantay sa mga panghitabo. Unsa kaha ang mahitabo? Oy bisan asa ka mangita niining kalibutana nga ang medya dakpon. Nga gani sa mga malambuong nasud ang medya mga tawong ginarespituhan.

Hala unsa na kaha kining klaseng panggoberno nga duna ta. Pangdakpon man gani ang mga taga medya unsa na kaha ang mga yanong katawhan nga mopadayag sa iyang pagbabag sa mga hiwing binuhatan?

(Ang MindaViews ang seksyon sa opinyon sa MindaNews. Si Jelieta E. Mariveles-Ruca bag-o lang migradwar sa iyang PhD sa University of Southeastern Philippines. Aktibo siya sa Gabriela ug sa Alliance for Concerned Teachers.)

Comments

comments