-
Apan sa panghitabo kagahapon sa usa ka turnover ceremony sa Dolor Elementary School nga kabahin sa Talomo District nawala gyud ang usa ka bag nga gipanagiyahan sa among supervisor nga si Sir Jose N. de Lara Jr. Usa kaha kini ka timailhan nga adunay pagkulang ang mga magtutudlo sa pagsilsil sa alimpatakan sa mga estudyante nga dili gyud manghilabot ug kinihanglan gyud nga matinud-anon? O kakulangon sa paghatag og pagtulun-an didto sa mga anak gikan sa atong mga ginikanan? O tungod ba kaha kini nga ang mga kabataan karon inpluwensado sa ilang mga nakita, naobserbahan, natagamtaman diha sa ilang palibot? Kinsa kaha ang angayan nga basulon sa panghitabo? Sa akong nasinatian, nawad-an usab ako og usa ka pocket calendar. Gamay lang kini ug masuksok lang sa bulsa. Ang sulod sa pocket calendar naa didto ang akong lisensya isip magtutudlo, ID sa DepEd, ug lisensya sa pagkadriver. Sa sulod sa gipilo nga pocket calendar anaa pud didto ang akong kwarta nga P400 kay moadto lagi ko sa downtown gikan sa akong panimalay. Human sa duha ka adlaw adunay nanawag ngadto sa usa sa akong mga amigo nga nahilatid nako didto inubanan sa iyang cellular phone number. Oi taga radyo diay nga mitabang pud sa pag-uli sa maong pocket calendar. Matud pa gihatud kini sa tawo didto sa ilang estasyon nga mao ang Radyo Bombo. Ang tawo wala gyud siya nagbilin sa iyang pangalan unta nakapasalamat ko niya og dako tungod kay wala gyud siya’y gikuha gikan sa akong pocket calendar. Ang kwarta anaa ug ang tanang ID. Siya usa ka matinud-anon nga tawo, limpyo ug sama sa kristal ang iyang kasing-kasing. Apan sukwahi kini sa nahitabo sa akong supervisor. Wala gyud marecover ang iyang bag, lakip na ang tanang tua didto.
Honesty is the best policy. Daghan ang maigo niining mga pulunga. Mao seguro nga ang nakakuha sa bag sa among supervisor nga usa ka bata, naimpluwensyahan lang seguro sa mga hamtong nga nagabuhat kanunay og pamakak ug kung mahimo kawat pa gyud nga harap-harapan o lantaran. Karon usa kini ka pagtulun-an kanatong tanan nga unta ang mga kabataan mahatagan nato sila ug maayong ehemplo aron modako sila nga adunay nakalatid. Di gyud mamakak ug kinahanglan matinud-anon.
(Ang MindaViews ang seksyon sa opinyon sa MindaNews. Si Jelieta E. Mariveles-Ruca bag-o lang migradwar sa iyang Ph.D. sa University of Southeastern Philippines. Aktibo siya sa Gabriela ug sa Alliance for Concerned Teachers.)