TINGOG SA SUBA: Manny, Oh, Manny!

Dining room area.

Liling : Mga jawa! Mga baga’g nawong! Kalami pusposan ninyo’ng mga animala mo!

Carl  : ‘nay, naunsa man ka? Kinsa ma’y imong kaaway?

Liling : Kanang mga nag-komentaryo sa radyo. Mga hilason! Ingon nila pildi daw si Manny ni Marquez. Pildi sa ilang ilong nga ka-klaro nga wala napatumba ni Marquez si Manny!

Carl :  Unya,wala man pud natumba ni Manny si Marquez. Naglisod man gani siya.

Liling:  Naglisod ba! Gisayaw-sayawan ra man gani niya.Di gani siya kaapas ni Manny.

Carl :  Pero daghan man gyu’y nagtuo nga pildi si pacman adtong dulaa.Dili man nimo malalis.

Liling  Kana ang akong gikalagutan! Mga traydor sila.Wala sila molaban kang Manny.Mura’g dili sila mga Pilipino.

Carl : Dili pud ‘nay oi.Klaro baya pud nga tagilid si Pacman atu.Siya gani mismo wala katuo nga nakadaog siya.

Liling: Unsa’y tagilid! Ikaw siguro’y gatagilid diha. Nganong molaban man ka sa pikas? Mexikano diay ka? Taga aprika diay ka?

Carl : Nanay baya.Wala sa Africa ang Mexico ‘nay oi. Naa sa South America.

Liling :Aaaay, wa ko’y labot kung asa dapit nang espidnoha na. Naglagot jud ko nga ilang gi-boohan si Manny.   Mga wala’y respeto sa mga Pilipino.

Carl : Dili man ang mga Pilipino ang gi-boohan ‘nay, ang decision man sa mga judges.

Liling : dii, respetuhan nila nag desisyon sa judges.

Carl : Ingon nila, tulo ra kuno ka tawo ang wala ka-klaro pag-tan-aw sa dula.

Liling : Kinsa man?

Carl : Ang tulo ka judges.

Liling : Suya lang sila kay napildi ilang manok.

Carl  : Karon, dakong kwestiyonabli ang pagkadaog ni Pacman.

Liling : Ug kinsa ang nag-kwestiyon niana? Ang mga dato? Mao jud na sila, daog-daogon nila si Manny abi kay pobre man kaniadto. Karong milyonaryo na siya, dili sila kadawat nga mas dato pa siya sa ila.

Carl : Di man lang mga dato ang nakakita ana ‘nay. Bisan gani mga pobre, mao man sab ang ilang ingon.

Liling  Dili oi. Ang pobre molaban jud sa pobre. Ang nag-pasikaat niana ang mga dato.

Carl : Pag sure ‘nay,nganong kanang atong silingan dihang si ‘nong Danny nga tig-ayo og sapatos, niingon man nga nadaya si Marquez. Siya kuno unta ang angay modaog.

Liling : Aw, ‘wa ta kabalo, basin sekrit milyonaire nang hinampak!

Carl  : Basin pud ‘nay kay panagsa ra ra ba na siya sa iyang puwesto diha sa corner, basin tua siya pirmi sa Boracay nagpahayahay. kapwa.

Liling : Lain po’y atu ‘dong. Unsa ma’y imong plano sa kinabuhi? Nganong di man lang ka mag-boksingero? Bata pa man ka. 16 pa.. Puwedi ka pang mag-trining.

Carl : Matuk-an man pud ta nimo ‘nay. Seryoso ka?

Liling  Seryoso ko oi. Maayo nang boksidor ‘dong kay dali ra ang kuwarta.

Carl  “nay, ikaw ra’y nanay nga akong nadunggan nga gusto mag-boxer ang iyang anak.Ganahan diay kang ma-black-ayan ko pirmi, malaksi ang ang nawong?

Liling : Naa ra man na sa paglika-likay ‘dong. Paabtikay ba. Sige na ‘dong. Pilay palad ma parehas ka ni Manny.

Carl :  Iring ‘nay. Di jud ko. Gusto ko mo-eskwela, mahuman sa college. Pilay palad sa iring-

Liling : Unsa man diay imong damgo ‘dong?

Carl :  Magtukod og beauty parlor!

Liling :  Ngeee!

 

(MindaViews is the opinion section of MindaViews. Ramon Jorge B. Sarabosing is a writer and visual artist based in Butuan City.)

 

Comments

comments