Baryo.
Ising: ‘dot,unsa ma’y imong gilantaw-lantaw diha sa unahan?
Pedot: Gilantaw lang nako ‘sing kung daghan pa ba’y kalasangan sa bukid.
Ising: Unya, naa kay nakitang salin sa kalasangan nga hakpa-hakpa naman na?
Pedot: Unsa’y hakpa-hakpa?
Ising: Pahak ba. Nipis na baya nang kalasangan diha kay inyo man nang gi-logging-logging.
Pedot: Nipis na bitaw nu, karon lang ko kabantay. Matay, dili ba kaha ni delikado?
Ising: Karon lang ka kabantay? Karon lang nga nakita nimo ang gisangputan sa baha sa Cagayan ug Iligan? Sa una, wala jud ka’y pakialam kung naunsa na ang bukid nato diha.
Pedot: Unya, kung di ta mag-logging-logging, unsa ma’y atong kan-on? Unsa ma’y ipa-eskwela nato sa mga bata?
Ising: Ikaw ra po’y makatubag ana ‘dot, kay mag-uuma man ka sa una, pero kay niingon man ka nga dali ang kuwarta sa pagpamutol sa kahoy, wa ko’y nahimo.
Pedot: Ambot bitaw, dali lagi pero purhisyo.
Ising: Kay kung ako ang pabut-on, okey ra man unta ‘tung mag-uuma ra ‘ta. Magbasak, mananom og mais ug lagutmon, gulayan, buhi og baboy, manok…
Pedot: Unya kung mananom ka, bahaon ra man gihapon. Wa man kay mahimo kay ang tanan sa baryo nangahoy na. Pildi gihapon ka.
Ising: Unya karon, basin kita na hinuon tanan ang mapildi? Basin uroy mag-ulan taman-taman, di ba kaha mag-flashflood, simbako?
Pedot: Nabalisa bitaw ko kay sa una, nagbaha na ra ba og lapok. Taga tuhod ra hinuon tu.
Ising: Nabalisa ka nga resulta man tu sa binuhatan ninyo.
Pedot: Kinsa ma’y di mabalisa nga libo-libong kahoy na man ang nangawala didto.
Ising: Sa sunod ‘dot, simbako lang, basin ma-konsiensya na ka.
Pedot: Ikaw ba, mura pud ka’g dili ka-kunsabo. Nitabang baya ka’g baligya sa mga Narra nga akong gipang-tagoan.
Ising: Alang-alang, gipugos man ko nimo. Dili baya jud ko gusto anang mga kahoy nga imong gipamutang sa bodega.
Pedot: ‘di ka gusto pero tabang ka’g tago ug baligya! Pag-sure oi.
Ising: Maulaw ko sa atong gibuhat. Mura ta’g taga DENR nga ang furnitures hinimo sa narra.Wala’y kalainan sa balay sa kapitan ug mayor.
Pedot: Giahak na ni.
Ising: Aw, kung mag-kinaunsa, dawaton nato kung unsa’y atong dangatan ‘ning binuhatan ta. Basin maningil na unya ang kinaiyahan.
Pedot: Hoy, di ko musugot nga maglutaw’ng butod sa suba. Mopalit ko og salbabida ug life jacket. Mangandam ta.
Ising : Unya, mubo man ‘ning atong balay. Lapawan ra gihapon ni.
Pedot: Magpatukod kaha ta og second floor. Unya,pabutangan nato og helipad.
Ising: Bright jud ka ‘dot. Bilib ko sa imoha.
Pedot: Pero akong gika-gul-an ang mga trosong akong gi-safety sa bodega. Basin maanod na sila.
Ising: Bitaw nu. Unya mabisto ka sa imong pag-pangawat anang mga trosoha.
Pedot: Hoy! Ayaw’g sulti ana kay basin dunay makadungog!
Ising: ‘wa baya ko labot ana ha. Ikaw baya ang mastermind ana.
Pedot: ’tilan ini oi. Purhisyo! Daghan ta’y hunahunaon.
Ising: ‘dot, pirs tings pirst. Unahon nato ang life jackit ug salbabida, plashlight, pisi…
Pedot: ‘sing, tagpila kaha nang … submarine, nu?
Ising: ‘dot, kalami nimo padasmagan og troso!
(MindaViews is the opinion section of MindaViews. Ramon Jorge B. Sarabosing is a writer and visual artist based in Butuan City.)
