Kining among kapitan
Eprin ang pangalan
medyo, medyo kahibulungan
usahay tagulillong
dili mi kahibalo
asa padulong
pero wala na’y kaso
kay si kap
tumpak sa serbisyo
waiting shed, basketball court
napatindog
kada fiesta
puwerting biboha
dako ang lega
kada gabii
pirmi bayli
kuryenti matag poste
hagbay ra
gisugdan na ang pag-simento
sa kadalanan ug kanto
dili na mabangbang
barangay namo
tulin ang asenso
wa’ gyud mi magbasol
si kapitan among giboto
pakapinan pa og singkuwenta
pildi ang trienta sa kontra
kung mangita ka
sa balay niya
dali mo’rang makit-an
kay sa kadako hilabihan
pagsulod mo sa panimalay
siguradong ikaw maglaway
mga kabtangan dili basta-basta
mora’g imported sa america
ang silya hinimo sa narra
ang lamisa sa yakal gi-karba
ang salog ginabas sa tugas
kinsa’y maka-ingon
nga ang balay ni kap
dili buenas?
pero aduna’y mga adlaw
nga si kap dili makit-an
atua daw sa iyang kaumahan
pero wala kami nasayran
kay gilibutan man kami
sa bukid ug kalasangan
dako gyud among katingala
dili ba ka, pastilan!
ungo si kapitan?
dili pud oi
mosimba man siya kada domingo
ug best friend pa gani ang obispo
nga nagsakay-sakay sa pajero
usa niana ka adlaw
wala’y undang ang ulan
naguol ang tanan
kay birthday ni kapitan
dakong kumbera
ang giandam
wala damha ang tubig
hinay-hinay nga misaka
sulog sa suba mikusog na
mamakwit na ‘ta
basin lapawan ta!
sugyot sa uban
dili musugot si kapitan
kay unsaon na lang
ang tulo ka lechon
nga gi-andam
dili maguol
ulan motuwak ra
padayon ang disco
ug kumbera
apan unsa ma’ng
pagka-unsaa
lapok ug troso
ang mihasdang nila
mga balay gianod
daw sama sa dagkong balod
wala’y nabilin gawas
sa balay ni kapitan
nganong nahitabo man kini?
pangutana sa tanan
dili ba aduna’y log ban?
kinsa ma’y namastamas
sa kalasangan?
wala maka-tingog si kapitan
mora’g natuk-an
sa ila’ng mga mata
gitulisok siya
gitan-aw niya ang barrio
daw mura na og simenteryo
pangutana sa tanan
