WebClick Tracer

KONTRA KOMPAS: Ang silingan

 

GENERAL SANTOS CITY (MindaNews/20 April) — Mahimo nga imong numero unong kontra, ilabi na kung kugihan moabli sa iyang baba aron isangyaw ang imong ngil-ad nga batasan, baho nga ilok… kaagi diay ug hiwing dagway eheste binuhatan.

Maayo ra ba unta kung giagi’g as-is-wer-is ang panabi, duna ra ba gyud na pirme balyu adid.

Kung mangita sa pasanginlan ug kontrabida, dili na motanaw sa layo, abtik dayon motudlo sa silingan.

Apan panahon sa kaguol ug kalisod, di ba siya ra usab ang imong dangpanan?

Nasyort ang imong gilung-ag kay lami ang sud-an, dagan ni Inday Siling. Way plete si Junjun nga mag-iskwela, adto sangpit ni Ondo Siling. Magpahungaw sa imong kaguol, adto ibanda ni Dodong Siling nga mao pay mokuot aron ipalit sa depataranta.

Kung moadto ka ug layo, susama ning kuwaresma nga gihimong panahon sa laag inay paghinulsol, ang mabilin nga silingan ang nahimong sekyu sa imong balay.

Siya ang buhi ug nagginhawa nga amahan o inahan sa kanunay panabang, ang imong kasaligan nga silingan.

Apan nakahinumdum ka pa ba kung kanusa ug giunsa nimo ug ila-ila sa imong silingan?

Sagad sa mga magsilingan, sa tando ug pahiyom ra nag-ila. Talagsaon di ba? Tingala bitaw ko nganong walay pista opisyal o pestibal nga nagpasidungog sa silingan.

Unang kita pa lang sa silingan, way daghang istorya, lamano dayon – usa ka timailhan nga gidawat nimo siya isip gasa sa panahon o kanang gitawag sa langyaw nga imong destini, ang gitagana sa imong ay-pa’d (Wa pa si Steve Jobs, kitang mga Pinoy duna nay gahilinghilingon nga ay-pa’d!).

Wa pa koy nadungog nga ang usa ka tawong wala ganahi sa mamahimong silingan, wa modayon ug puyo sa maong dapit.

Matud pa lagi sa katigulangan eheste among labandera, bulagon ang dekolor sa puti. Sa iningles, berds of dasim peder plak tugeder. Ang mga balahibuon adto ra tapok sa mga balahibuon, ang mga upaw adto ra pud sa mga sinaw ay upaw.

Sa klarong pagsabot, kung giunsa nimo ug tanaw ang imong silingan, imong makita imong kaugalingon.

Mismo Ignasyo, ang imong pananaw sa silingan nagsalamin sa kung si kinsa ikaw. Busa kung moingon ka nga ang imong silingan tulibagbag, mora na pud ka ug miamin nga ingon ka niana.

Apan kung imong makita ang kaayohan sa imong silingan, nagpasabot nga daghan unya ang gustong mamahimo kang silingan.

Si Juan lagi ay tua karon sa presohan, gipasanginlang nangawat sa silingan niyang kongresman.

(Ang MindaViews ang seksyon sa opinion sa MindaNews. Si Rommel Rebollido usa ka journalist ug documentary photographer nga anaa nagpuyo sa General Santos City. Anak sa magtiayon nga Ilokano, nagdako kini sa Mindanao – sa dakbayan sa Cagayan de Oro ug Cotabato ug sa lungsod sa Malabang , Lanao del Sur. Kasamtangan kining nagdumala sa usa ka istasyon sa telebisyon sa General Santos.)

Your perspective matters! Leave a comment below and let us know what you think. We welcome diverse viewpoints and encourage respectful discussions. Don't hesitate to share your ideas or engage with others.

Search MindaNews

Share this MindaNews story
[custom_social_share]
Send us Feedback