WebClick Tracer

KONTRA-KOMPAS: Inato lang

DAKBAYAN SA GENERAL SANTOS  (MindaNews / 13 April) — Nganong Binisaya ug dili sa pinulongang Ingles? Pangutana sa mga kahigalaan dihang misugyot ko sa pagsulat ug komentaryo sa Binisaya.

Alang-alang, kadaghan na sa ga-Iningles, modugang pa ta. Modugo pa unya atong platnos.

Bitaw, magbinisaya ta, bakikaw man o tul-id, kay mora ko ug nahagit sa kahimtang sa atong inato nga pinulongan nga morag gikontamina nianang mga pinulongan sa mga langyaw ning dapita sa Mindanao.

Abi ba lang nimo, apan linglinga gyud ug maayo kay makuratan ka sa nahimong epekto sa teknolohiya ngadto sa atong kaugalingong pinulongan.

Animal jud na dog. Sinabing huwag tumabok, nagkrus jud. Naligsan tuloy!” Unsa yun, eheste unsaon na lang kung mag-ingon niana na ang atong pinulongan?

Daghan sa mga kabataan karon maglisod ta ug sabot sa ilang gipanglitok. Daghan usab kanila ang naglisod makasabot sa pinulongan sa katigulangan. Dili ba kaha panahon na aron dunay igong pagtuon niini ang mga banggiitan nga sige na lang lalis sa kung si kinsa ang mikuha sa baboy ug kwarta?

Di layo mahitabo, momata kita usa ka buntag nga magsininyasay na lang kay di na magkasinabot sa atong sinultihan. Unsay senyas sa maayong buntag? Unsa pud kaha ang itsura sa mga libro sa kaagi sa umaabot nga panahon?

Hinay-hinay na ug kawala ug nabag-o na ang daghang pulong inato ug misagol ang mga impluwensiya sa mga langyaw.

Matud sa uban, dala kini sa gitawag nga “globalization” nga gihimugso sa teknolohiya nga nagdala sa daghan nga pagbag-o.

Morag di masuklan ang pagbag-o dala nianang “globalization,” apan, una pa man lamoyon sa pagbag-o ang pinulongang inato, di ba angay nga lig-onon kini aron pud unya dili kini daling usapon sa kabag-ohan ug magpabilin pa sa dugay nga panahon?

Dili angay wagtangon sa alimpatakan sa mga kabatanonan, lakip na ang umaabot nga henerasyon, ang pahinumdum ni Dr. Jose Rizal nga ang tawo nga wala magmahal sa kaugalingong pinulongan, labaw pa kabaho sa bulok nga isda nga dili madala sa bisan unsang ligo.

Kanang dili tanto makasabot sa inatong pinulongan, anaa ug daghan ang kahigayonan aron magtuon nga libre ug walay matrikula. Di pa ka mag-sunggo.

(MindaViews is the opinion section of MindaNews. Rommel G. Rebollido is a journalist and a documentary photographer based in General Santos City. Born to Ilocano parents, he spent his growing-up years in Malabang, Lanao del Sur, and the cities of Cagayan de Oro and Cotabato. He currently edits a daily vernacular tabloid)

Your perspective matters! Leave a comment below and let us know what you think. We welcome diverse viewpoints and encourage respectful discussions. Don't hesitate to share your ideas or engage with others.

Search MindaNews

Share this MindaNews story
[custom_social_share]
Send us Feedback