WebClick Tracer

KONTRA KOMPAS: Ang Silingan 2

DAKBAYAN SA GENERAL SANTOS (MindaNews/May 20) — Sa mga milabay nga katuigan dihang menos pa ang gidaghanon sa mga Pilipino, ang mga panimalay nga bisan duha o lima ka kilometro ang gilay-on, magkaila ug magtinawganay nga silingan.

Karon nga anaa na dul-an 100 milyon ang gidaghanon natong mga Pinoy ug kasagaran sikit na ang mga balay , daghan sa mag-silingan ang mag-ilhanay sa nawong ra.

Yur luk is pamili to me?! Apan daghan na ang kausaban nianang pagka-pamilyar.

Nakabantay ka ba nga dili na pulos Pinoy ang mag-silingan ug bisan magparente, apan, nagkadaiyang kolor na – mora na ug rainbow ang kasilinganan o nayborhud! “Kasin-in-law ko nang German shepard,” asoy sa silingan sa Aleman nga nagbuhi ug daghang karnero.

Nahutdan ka ug sibuyas, sangpit lang sa silingan nga Bumbay!

Bitaw kung nakamatikod ka, daghan mga langyaw ang anaa na nagpuyo sa Mindanao – nagnegosyo, nagtungha, nagtuon, namista, naglipaylipay, naningkamot sa panginabuhi susama sa usa ka Pinoy.

Nakasakay na ka sa jeepney nga Kano ang namasada? Yes Dyow, sa Gensan siya nagtikaw-tikaw Dyow. Ayaw katingala kung masakyan nimo ang habal-habal sa usa ka Aleman, “Sibug owg duw-owt gemay arawn kita mow-ego.”

Kano, Koreano, Tsino, Hapon, Arabo, Aprikano, Aleman, ug Sibuyas este Bumbay ang anaa na nagtapok ning yutang gisaaran (Asa na ang gisaad?).

Samtang daghan Pinoy ang milangyaw, daghan usab sa mga langyaw ang miari sa Pinas. Moabot ba uroy ang adlaw nga mas daghan pa ang langyaw kontra sa Pinoy dinhi sa nasud, naintonses na!

Sugot ka nga imong kapitan sa barangay, Sibuyas? Sa sistema sa atong pamalaod ug sa batasan sa gitugyanan niini, dili imposibleng mahitabo kana. Mamahimo na unya nga “internasyonal” ang imong barangay, di pa ka ana?

Sa una bitaw, ang ngalan sa mga suspek sa “blotter” sa kapulisan puros ra sa Pinoy – Boy Tukog, Islaw Tigkaw, Toto Tapik, Yikyik Pitik, Kulas Idlas, Kurdapya ug uban pa.

Karon, aduna nay mga nga’n sa langyaw ang blotter – Xien Xa, Ah Muy, Valda, Ja Vag, Singh Jit, Vat Lee Vag, etc, nga kuno nangulata, nangupit sa tindahan, namukong sa bar, wa nagbayad sa utang, nag-adik-adik, ug uban pa.

Kana ang pipila sa mga kausaban ug kamatuoran karon sa atong mga kasilinganan nga pabilin nga buhi ug padayon nga nagginhawa ilawom sa inato ng kahapsay ug kalinaw.

Kamatuoran sa kasilinganan nga adunay kalinaw bisan pa man sa ginagmay nga pagpangistorbo sa kahapsay.

Kalinaw nga wala gisalig sa papel ug nagpakita sa tinuod nga pundasyon sa yanong pagsinabtanay sa mga magsilingan. Kini nga kamatuoran sa kalinaw nga dugay nang nagpabilin sa Mindanao bisan wala pa ang mga langyaw.

Apan sa panan-aw sa mga anaa sa kaulohan ug sa laing dapit gawas sa Mindanao, padayon pa nga ginagukod ug idlas kuno ang kalinaw sa Mindanao. Sa pagpirmahanay madakpan kuno ang kalinaw?

Naunsa baya mo oy. Ang kalinaw dili susama nianang mogawas sa sampot nga madakpan sa papel.
Anaa kini sa dughan sa mga magsilingan, unsa man ang kolor – puti, itom, pula, dalag, brown, etc.
Hagbay ra.

(Ang Kontra Kompas mao ang kolum sa MindaNews ni Rommel Rebollido, usa ka yano nga journalist ug documentary photographer nga anaa nagpuyo sa General Santos City. Anak sa magtiayon nga Ilokano, nagdako si Rommel sa Mindanao – sa dakbayan sa Cagayan de Oro ug Cotabato ug sa lungsod sa Malabang , Lanao del Sur. Kasamtangan kining nagdumala sa usa ka istasyon sa telebisyon sa dakbayan sa General Santos.)

Your perspective matters! Leave a comment below and let us know what you think. We welcome diverse viewpoints and encourage respectful discussions. Don't hesitate to share your ideas or engage with others.

Search MindaNews

Share this MindaNews story
[custom_social_share]
Send us Feedback