Bága sa ibabáw, bága sa ilalom,
sa walá kaláyo, sa tuó kaláyo gihapon,
haskang paita, ambot asa mi padulong,
among kahimtang daw bibingka intawon.
Nanagsumpaking mga puwersa nga armado,
tigpanalipod sa katawhan kunó pareho;
apan sa higayon sila manag-engkuwentro,
kaming katawhan intawon ang magkadipó-dipó.
Mabawo intawon og hapà-hapà ug karatil og dagan,
guyod ang kabaw ug unsa pang madala nga hayopan,
hagudhod padulong sa bisan asang kabakwitan
kuyog ang mga batang gipanghubagan kay gilubat-lubatan.
Pugos nga biyaan ang mais nga sanggionon na
aron mahalikay sa nagpungasing bala ug bomba
nga walay pakabanâ anang Kombensiyon sa Geneva –
ma-sundalo, rebelde, sibilyan, kabaw walay giila.
Ug dinhá sa bakwitanan kami managhuot,
sa salog ra kami ug ang mga batà mangatulog,
mag-aguwanta sa kaadlawon nga tun-og,
samtang maghulat nga maundang ang kagubot.
Pagkahuman sa ilang armadong panagkarambola,
mamalik na pod kami sa among pinuy-anan ug uma;
untà ang nabiyaang puluy-anan, pananom ug hayopan naa pa,
untà kini walâ maapil pagkahimong kasuwalti sa ilang gera.
ERIC S.B. LIBRE
28 Pebrero 2015