WebClick Tracer

TULA: Tiyakap Kalilintad

Nagkalat,
maayos na pagkakalat,
ang naglaglagang mga dahon ng talisay
sa bakuran nina Ustadz Utto
at Kumander Noran.
Kayumangi, pula, dilaw, rosas –
mga kulay na nagpapaalala sa akin
ng napipintong taglamig
at taglagas.

Subalit dito’y kasukdulan pa ng tag-init
at di lamang dahon
kundi buhay ang
napapatid
at nalalagas –
buhay ng ina, wata, ama, kaka;
buhay ng apo, bapa, babu;
buhay ng ng kalaba’t kaibigan:
buhay ng rebelde’t sundalo;
buhay ng balo at CAFGU;
buhay ng manok, kambing, kalabaw, aso.

Di namimili ng oras at lugar ang kamatayan;
Dumarating na lamang itong kusa,
di tulad ng bagyong mayroon pang babala;
di rin ito namimili ng biktima.

Kadalasan, nakasuot-patig ang biktima’t salarin.

Tiningala ko ang mga punongkahoy
at nakita ko ang mga munting bahay-ibon
na nagpugad sa malabay nilang mga sanga –
nandoon ang mga kalapati, para bang nakikinig
at matamang nakamasid
sa ating pag-uusap at mga kilos,
habang ang iila’y naglalambingan
o buong gilas na ipinapagaspas
sa ating pandilig ang kanilang mga pakpak:
mistulang mga palakpak sa pagitan ng mga halakhak.

May balahibong nalagas;
Sinundan ito ng aking paningin.
Subalit sa biglang hihip ng hangin
ay natabunan ito ng mga dahon.

Di kalayuan sa ilog,
nakangiting pinagmamasdan ni Ustadz Utto
ang apo niyang nasa duyan
habang idinuduyan ng alon
ang bangka nating naghihintay sa pampang.

Ligawasan Marsh
Setyembre 11, 2006                                                                                    

Ang tiyakap ay salitang Maguindanao na ang ibig sabihin ay pangangalaga o pag-aruga, samantalang
ang kalilintad naman ay kapayapaan. Sa lalawigan ng Maguindanao, ang Tiyakap Kalilintad ay isang
samahan ng community peace volunteers na tumutulong sa pagsubaybay sa mga paglabag sa
karapatang pantao, sa tigil-putukan, at sa pagpapalaganap ng mapayapang pagsasaayos ng mga gusot
at hidwaan sa pamayanan.

[The author is a native of Mindanao and did a field research on local capacities for peace in the aftermath of former president Estrada’s all-out-war against the MILF in 2000. He used to work with Cotabato-based Kadtuntaya Foundation, Inc. (KFI) from 2006-2009 as a seconded personnel of EED (Church Development Service) and from 2010-2014 with Bread for the World under the later’s Civil Peace Service program. This poem, which is a part of a journal, was written during his field visit to the towns along the Ligawasan Marsh in September 2006 together with members of Tiyakap Kalilintad (Care for Peace), a community-based peacebuilding group organized by KFI in the province of Maguindanao.]

 

Your perspective matters! Leave a comment below and let us know what you think. We welcome diverse viewpoints and encourage respectful discussions. Don't hesitate to share your ideas or engage with others.

Search MindaNews

Share this MindaNews story
[custom_social_share]
Send us Feedback