COMMENTARY: Ang Tinolang Manok ni Pacman

LOS ANGELES (MindaNews/24 March) – Dili ika’glimod nga wala gyoy paglubad ang pagka-bisaya’ng dako ni world boxing champion nga si Manny Pacquiao tungod kay apil kanunay sa putahe nga iyang ginakaon dinhi ang kinamunggaya’ng tinola’ng manok.

Gani, apil kanunay sa nagkabaga’ng duot sa katawhan nga kuyog sa halangdo’ng kongresista sa Sarangani  sa iyang mga away, mao ang iyang pinili’ng mga kusinero.

Mabiyaan lang ang uban, apan ang mga kusinero, front seat kanunay sa biyahe.

Dinhi sa Los Angeles, paborito sad niya’ng adtoan matag pamahaw human sa iyang jogging ang usa ka Thai restaurant.

Apan pagkahuman sa iyang pila ka oras nga training sa WildCard gym ni Freddie Roach anang pagkahapon, naghulat na niya ang nag-aso sa kainit nga tinolang manok.

Maayo gani kay naay Filipino store dinhi, mao nang makapalit ang iyang mga kusinero og kamunggay. Alang kang Pacman, mag unsa man ang tinola’ng manok nga walay kamunggay ug hilaw nga kapayas.

Nahimo sa’ng paborito ni Pacquiao ang tinola’ng tuna panahon sa iyang away kontra sa Mexicano nga si Antonio Margarito sa Dallas, Texas niadtong 2010.

Gani, ang tuna gikan pa gi-order sa Gen San, nga mao sa’y iyang gikaon matag panihapon. Diha gihapon ang iyang mga kusinero, apan tungod kay naglisud sila’g pangita ug kamunggay, napugos lang sila’g pangita og substitute nga mga utanon nga dahon dahon.

Nagkadugo intawon ang nanghuboy nga nawong ni Margarito sulod sa 12 ka rounds. Gani, miaksyon ma’g sinyas si Pacquiao sa referee nga ipaundang na unta ang away kay kulatado na kaayo ang Mexicano nga di sad mo surrender.

Nan karon kay manok man ang kinaon ni Pacman samtang nangandam sa iyang away kang Floyd Mayweather Jr., unsa kaha’y mamahimong hulagway sa nawong sa Amerikano’ng boksidor nga hangtud karon wala pa makatilaw og pagka pilde?

Tuod, nangutana kita kon unsa mang klaseha sa manok ang ginakaon sa atong Pinoy champ; manok bisaya ba?

Mora’g American bisaya, hunghong pa’s mga kusinero, tungod kay gipalit man ni nila sa usa ka farm dinhi sa Los Angeles nga nagbuhi og mga manok nga binuhian lang sa nataran.

Comments

comments