WebClick Tracer

HABAGATNONG HINAGAWHAW: Napul-an Na Mi

Naa na pod ba?
Abi ba nakò to og walâ na.
Unyà, karon ingon na sab nga puyde ra?
Naglibog na gyod ko ba.

Atras-abante,
pawala-patuo –
pagkawalâ bay klaro.
Unsa man gyod ni?

Ngadto sa unahan mopadayon ba ta?
O dinhi daplin sa dalan moyakâ ra?
O kundilì ba nuon moatras ta,
ipatigbabaw ang kabubut-on sa mga utok-pulbura?

Pagklaro na god tawon mo bi.
Kanang garbo ayawg ipasulabi,
gimithing kalinaw maoy barogi
ug kaugmaon ning nasod ang panalipdi.

Sa pagpangitag sulbad nga tinuod
niining hapit tungag siglo nang kagubot,
dilì magsilbi ang pagka mabawg lubot
ingon man ang pagpadala sa bul-og sa kalagot.

Ubay-ubay na sab ang higayon
nga abi namog kalinaw atò nang maangkon
apan sa panaggubat ningbalik ra gihapon
taliwalà sa iya-iyang binasolay ug akusasyon.

Nianang inyong atras-abante
sa kapuol gibatì na kami
apan paglaom walâ namò buhii,
pangaliya sa kalinaw walâ undangi.

Eric S.B. Libre
7 Abril 2018

Your perspective matters! Leave a comment below and let us know what you think. We welcome diverse viewpoints and encourage respectful discussions. Don't hesitate to share your ideas or engage with others.

Search MindaNews

Share this MindaNews story
[custom_social_share]
Send us Feedback