HABAGATNONG HINAGAWHAW: Máoy

Naa koy kaila
nga kon mahubog na
haskan gyod tawong maoya.
Pero maingon ta
nga normal ra nâ siya
nga mawad-ag taróng pensada
gumikan sa alak nga naghinobra.

Pero ang akong gikatingad-an
kanang ubang tawo nga atong hingmatikdan
nga ang kahubog walâ na gikinahanglan
aron labaw pa sa máoy nga batasan
ipasundayag ngadto sa kadaghanan,
daw walay bisan tipik nga kaulaw nga gihuptan
ug ganì mapasigarbohon ug mapahitas-on pa man.

Busa usahay magduha-duha lang ko
kon tinuod ba gyod kini sila nga tawo
ug dilì ba kahâ daotang mga espiritu
nga gikan sa ambot asa nakaeskapo
kay ingon man god og makatimahô ko
sa makasud-ip nga asidong inalisngaw
sa asupreng nagbukál ug nangalisbo.

© Eric S.B. Libre
18 Abril 2019

(Eric S.B. Libre is a Mindanawon freelance development consultant who has done some work in a number of conflict-affected areas of Mindanao and occasionally dabbles in creative writing. He lives in Digos City, and is proud to be a senior citizen.)

Comments

comments