KOMENTARYO: Kagangkagang

Want create site? With Free visual composer you can do it easy.

DAVAO CITY (MindaNews / 22 July) – Inig hapit na mutungtong ang orasan sa alas dose sa kaadlawon, madunggan nimo ang nagkadaiyang danguynguy sa mga pasahero nga sama kabanha sa kagangkagang nga makina sa dyip ni Angkol Drayber nga ginagukod sa LTFRB kay di na daw road worthy.

Ang asawa ni Angkol Drayber, nga iyang giuban sa pasada, nag sigeg yawyaw nganong magsigeg pamara si Angkol sa mga chix sa kilid bisag onse-onse na ang sulod sa walo-walo nga jeep. Ang nawng ni Ante Konduktor di na madrowing.

Naa sab ang pagpanglibak ni Trixie ug Sophia sa ilang amiga nga si Janeth nga kuno bugok sa gugma kay mag sigeg pakig balik sa iyang ex bisag kapila na siya gitwotime. Ka sad!

Si Angkol Kristoff James (sa akong banabana 57 anyos na) perting kiliga sa pagpanawag kay Eunice. Dungog kaayo nako nga magkita sila sa Magsaysay Park ugma sa alas 5 sa hapon ug checkered nga pula-itom ang suoton ni Angkol Kristoff. Nindot ug quality ang loudspeaker sa cell phone ni Kristoff, bai. Sa kanindot, na estimate nako nga pang 17 anyos ang tingog ni Eunice.

Daghan pa bai!

Saksi ang mga daot nga side mirror, gitagiptip nga seatbelt, guba nga kable sa bakal nga kapyutanan sa mga katulgon na, ug ang mga tuwalya nga  Hello Kitty ug Mickey Mouse ang design gidikit sa mga bangko sa jeep ug gipa-ibabwan ug plastic cover, sa mga danguynguy sa mga pasahero.

Ug makaisturya ang jeep, maka ingon guro kini nga gikapoy na siya sa pagpaminaw sa mga baho sa katawhan nga sa iya gipahungaw.

Mga sikreto sa sama ka baho sa aso nga ginagawas sa tambutso sa jeep nga walay change oil change oil apan di jud madakpan kay hawd mulikay sa dakop.

Inig hapit na mutingog ang orasan para sa alas dose sa kaadlawon, luyo sa kamingaw sa dalan, naa ang kabanha sulod sa mga kagangkagang nga dyip sa mga mulo sa katawhan nga way laing kapahungawan.

(MindaViews is the opinion section of MindaNews. Julianne Suarez is a journalist in Davao City. She finished Development Communication at Central Mindanao University in Bukidnon. You can reach her at [email protected])

Did you find apk for android? You can find new Free Android Games and apps.

Comments

comments