HABAGATNONG HINAGAWHAW: Putragis Nga Kanta

Putragis ba ning kantaha, makahilak man pod ta!

Nakadungog ka na ba anang kanta
nga hilabihang mingawa?
Ang mga titik niini ug ingon man ang iyang huni
sa dughan makapahuot ug sa kasingkasing mokumot,
sa mga mata makapalugmaw sa luha
ug sa pagbatì sakít kaayo nga mangusî!
Daw dilì ko na buot niini manalinghog
kay sa galamhan kini makatandog.

Putragis ba ning kantaha, makahilak man pod ta!

Dilì ko na buot kini pa nga ipatugtog,
dilì ko na buot pa nga kini madungog.
Kay gawas nga ingon kini sa alingugngog,
sa kasubô kini makapasilaob
nga mohaguros daw pintas nga bul-og
nga sa kalibotan ko makatay-og.
Busa kon puyde pa, idilî ko na niini ang pagkanta
kay basin sa kamasulub-on niya dilì na unyà ko kaaguwanta.

Putragis ba ning kantaha, makahilak man pod ta!

Apan dihang ang maong awit nahilom
kay ang nanag-awit napahunong ko ug napatak-om,
ako giabot sa tumang kalibog ug kahibulong
sanglit ang kasubô kong gihambin naa ra man gihapon.
Ug gikan sa kahiladman sa galamhang nagbangotan
mibuhagay ang pangagho ug danguyngoy nga giluom,
nagpahimugsò sa saloma nga masulob-on
nga sa kalibotan ko nagdalá og dag-om.

Putragis ba ning kantaha, makahilak man pod ta!

Eric S.B. Libre
4 Agusto 2020

Comments

comments