Sa tinuod lang,
nabalaka bayâ ko
pero sa akong pamatì
walâ man koy mahimo
mao nga nabalaka ko.
Morag ang tanan nagkayagaw
sa pag-iyahay og tagawtaw,
ambot lang kahâ
naa bay naminaw,
mao nga dilì na lang ko
modugang pa sa kayagaw.
Maypa tingalig magpadaplin lang,
maniid ug manimbangtimbang
aron maayag ning kaguliyang,
basin pa og makaplagan
unsa gyod ang maayo
para sa kaayohan
ug kaugmaon
ning yutà tang natawhan.
Eric S.B. Libre
1 Pebrero 2022