Alas otso pasado nag-brownoutnatunong nga gaulan pa gyod.Kay walâ man koy mahimo sa kangiob,nagpahinayak na lang kog tikungkong ug bukot.Ug ako nahibalik pagkahinanok, tingali nihagok.
Mga alas onse nakamata ko, brownout ra gihaponug ang bunok sa ulan nagpadayon.Daw naalimungawan akong namatngonankidlap-kidlap sa pulang suga sa sakyanannga naghunong sa kilid sa dalan.
Diay kadto sakyanan sa mga lineman nga bahala na og nagbunok ang ulan nagsubay nganong brownout sa among dalan para maayo kon unsay hinungdan ug ang amo intawong mga suga maulian.
Ang nibuto nga fuse sa transformer ilang giatiman dinha sa poste sa tungod sa among silingan pero ambot ngano among kuntador pod nibuto man busa kini na sab ang sa pagtagad ilang gihatagan aron mahatagan og tukmang kasulbaran.
Gipahulam nato sila og payong nga ikapandong aron dili kaayo mabasa samtang nagpadayon pag-ilis sa among kuntador nga pila ka bulan nang wala nag-function ug sige rang saad sa tigbasa niini nga ireport sa ilang opisina aron kuno sa bag-ong kuntador mailisan na.
Nahuman sila hapit gyod tungang gabii na ug ang among mga suga nibalik na og siga, pero intawon ang mga lineman bisan nagpayong pa sa ulan gihapon haska gyong pagkabasaa ug sa akong duda gipanugnaw na.
Sa dayon na nilang pamahawa ug larga, nagpasalamat mi og dako kanila kay ang among kuryente nahibalik na ug ang among kuntador nailisan pa. Dayon kami sa pagkatulog namalik na.
Apan una ko nahibalik sa pagkahinanok sa akong alimpatakan dihay kalit nisantop: pastilan buanga na lang gyod nganong wala man lang ko makahinundom nga sila sa pagpangape kadiyot agdahon?
Eric S.B. Libre27 Abril 2022
