DAKBAYAN SA MALAYBALAY (MindaNews / Mayo 4) – Matud pa usa ka panultihon, ang istatistika morag underwear, ang iyang gipakita importante, ang iyang gitabunan undanon.
Ang mga numero gikan sa survey apil sa gitawag nga istatistika, nga gikutlo gikan sa tubag sa mga giinterbyu o respondents. Kung nagsubay sa siyensya ang pamaagi sa survey, sama sa pagpili sa respondents, makonsidera nga kini masaligan isip sukod sa sentimento sa katawhan mahitungod sa usa ka isyu o eleksyon.
Daghang survey na ang gihimo alang sa piliay karong Mayo 9, ug pirmi nag-una si kanhi senador Ferdinand R. Marcos Jr. Kung basehan ang mga survey, walay tsansang modaug si Bise Presidente Leni Robredo.
Apan, sama sa akong giingon sa miaging kolum, gikwestyon ang maong mga survey. Wala kuno kini naghulagway sa aktwal nga dagan sa kampanya. Gitulisok usab ang Pulse Asia sa padayong pagpakahilom kung kinsa ang nagbayad sa mga survey.
Dili ako segurado kung obligado ba ubos sa balaod ang usa ka survey firm sa pagbutyag sa ngalan sa ilang kliyente. Apan, tungod kay ang eleksyon nakaapekto man sa interes sa publiko, mas maayong mahibal-an kinsa ang nagbayad. Mosamot ang pagduda kung kini ilang ihilom.
Karon, posible bang si Robredo ang modaug bisan lahi ang giingon sa mga survey?
Ang uban nipahinumdum nga didto sa Eatados Unidos nisipyat ang mga survey sa pipila ka higayon. Pananglitan, gitagna si kanhi senador ug First Lady Hillary Clinton nga modaug batok kang Donald Trump, apan napildi ang kapikas ni kanhi presidente Bill Clinton. Gitagnang modaug si Trump batok kang kanhi bise presidente Joe Biden, apan napukan si Trump ug nigawas sa White House sa tumang kalagot.
Sa ato pa, ang bola lingin ug walay kasegurohan ang tanan tinuod man o dili ang resulta sa mga survey.
Gani, nahinumdum ako nga diha kadtoy usa ka eleksyon diin nagsori si Mahar Mangahas, pangulo sa Social Weather Stations, kay medyo adunay kapalpakan ang ilang survey. Siya nidugang nga ang resulta sa eleksyon maoy magsulti kung ensakto ba ang mga survey, ug dili ang mga survey maoy maghukom kung lehitimo ba ang eleksyon.
(Ang MindaViews mao ang opinyon nga seksyon sa MindaNews. Maabot si H. Marcos C. Mordeno sa hmcmordeno@gmail.com.)
