DAKBAYAN SA MALAYBALAY (MindaNews / Mayo 3) – Daghan nagduda nga nagpasulabi kining Pulse Asia (gitawag sa uban nga False Asia) sa ilang mga survey kay wala man naghimog ilang kaugalingong survey ang Social Weather Stations, nga makahatag untag ideya kung masaligan ba ang mga resulta pinaagi sa pagkumpara sa mga numero.
Ang usa ka posibleng rason, walay media nga nag-sponsor og survey maong nagpuyo na lang ang SWS. Kung walay media sponsorship, sa ato pa pulos commissioned o adunay indibidwal o grupo nga nagbayad sa Pulse Asia alang sa mga survey.
Maingon man usab sa mga laing survey firms nga walay track record ug nibutho nga daw mga uhong human sa ulan. Gani, ang pangulo sa usa ka bagitong survey firm giingong usa ka dumadapig ni Pangulong Duterte.
Dili ikatingala ang mga pagduda nga adunay hocus pocus ang maong mga survey kay kini commissoned man lagi. Ang argumento sa mga nagduda mao nga, mopagawas ka bag resulta nga dili pabor sa imong kliyente?
Lain pa nga argumento mao nga ang mga resulta, labi na ang mga bag-o, wala nagasalamin sa gidaghanon sa mga dumadapig nga nitambong sa mga rali sa nagkaatbang nga mga kandidato.
Matud pa sa usa ka iningles nga post sa Facebook, “Dynamic campaign but static numbers?” Hinungdan nga para sa uban ang mga survey nahimo na lamang hinagiban aron makondisyon ang hunahuna sa mga botante sa resulta karong Mayo 9.
Dugang pa, kung segurado kuno ang usa ka kampo sa mga resulta sa survey, nganong nakigkontes pa sila kung kang kinsang rali ang mas daghang nanambong. Ang mga hulagway, matud pa, sa pipila ka rali gimanipula aron ingnon nga baga kaayong duot sa katawhan ang nitambong. Gitamnan og sibuyas, ingon sa uban.
Nisamot ang mga pagduda kay ang tanang komisyoner sa Commission on Elections pulos mga tinudlo ni Pangulong Duterte kansang anak mao ang running mate ni Marcos Jr. Gani, ila na mang gibasura ang mga petisyon batok sa kandidatura sa anak sa nipanaw nga diktador.
Lain pa, si Senador Imee Marcos, igsoon ni Marcos Jr., nagpahimangno sa posibleng tikas sa eleksyon pinaagi sa pagmanipula sa computer program nga gamiton alang sa pag-ihap sa boto. Usa kini ka indirektang pag-ingon nga adunay laraw ang oposisyon nga manikas.
Apan nibalos ang mga dumadapig sa oposisyon nga ang adunay katakus nga manlimbong mao ang gidapigan sa administrasyon. Kay pulos man tinudlo ni Duterte ang naa sa Comelec karon, ug natural nga adto siya modapig sa iyang anak, klaro kung kinsa ang gipasabot nga mga kandidato.
Sa katapusan, moingon na lang ako nga dili na lang maguol kay posible nga ang umaabot nga Senado mas alegre kaysa nangagi. Hunahunaa ra gud ang kabibo sa ilang sesyon kung mosayaw si manlalaban Harry Roque og ballet inubanan sa awit ni Robin Padilla nga Wonderful Tonight.
Pero dili sila magpalabig kiat kay basin sila ma-Tulfo.
Eid Mubarak sa atong kaigsoonang Muslim!
(Ang MindaViews mao ang opinyon nga seksyon sa MindaNews. Maabot si H. Marcos C. Mordeno sa hmcmordeno@gmail.com.)
