WebClick Tracer

SOMEONE ELSE’S WINDOWS: Si Bongbong ug ang buhis

mindaviews someone elses windows

DAKBAYAN SA MALAYBALAY (MindaNews / Pebrero 8)—Mao na ni karon, si Presidente Ferdinand “Bongbong” Marcos Jr. nagdasig sa publiko nga mobayad sa ENSAKTONG buhis sa gitakdang panahon aron suportahan ang pagbangon ug paglapad sa ekonomiya sa nasud.

Naa bay nakadungog sa iyang awhag? Sa akong mga apohan pa nga nitaliwan nas laing kalibutan, ambot sa ok-ok pilay edad sa cockroach.

Kadtong nanghinaway kang Bongbong tungod sa P203 bilyones nga buhis nga wala gibayran sa iyang pamilya taliwala nga pinal na ang desisyon sa Korte Suprema mahitungod niini, aw, mangyam-id gyud sila ug moingon, “Saba diha, otro pod ka.” Sa maningles pa, “Look who’s talking.”

Ambot lang kaha sa mga nibotar kaniya apan nakabantay nga morag bakikaw ang iyang gipamulong kung basehan ang isyu sa buhis batok sa iyang pamilya. Tingali sila pod medyo nag-alingasa, nagpanglingo sa ilang mga ulo sa tago.

Sa maningles gihapon, si Bongbong adunay credibility problem kung ang hisgutanan bahin sa buhis. Wala siyay kalainan sa usa ka amahan nga nagsulti sa iyang anak nga dautan ang bisyo samtang nanigarilyo ug nagkupot og botelya sa ilimnong makahubog.

Akong ma-imagine (maningles na pod) nga samtang siya nagsulti sa maong mga pulong, niagas ang bugnawng singot gikan sa iyang agtang bisan sobra katugnaw ang aircon. Tingali, pagkahuman adto, nidalidali siyag sulod sa usa ka lawak nga siya ra ang tawo ug nagpahungaw sa dili niya masabot nga gibati. Indescribable feeling, matud pa sa awit nga “A Whole New World” nga unang gikanta nila ni Brad Kane ug Lea Salonga.

Dili ikatingala nga gihimo na hinoong sumsuman sa pisbuk ang maong pamahayag ni Bongbong. Batikos dinhi, batikos didto. Kantyaw dinhi, kantyaw didto. Matud pa sa usa ka awit sa Beatles, “Here, There and Everywhere.”

Ops, nisipyat ko, awit sa gugma man diay kana. Aw, bantog ra, Pebrero na man diay.

(Ang MindaViews mao ang opinyon nga seksyon sa MindaNews. Mahimong makighisgot kang H. Marcos C. Mordeno pinaagi sa hmcmordeno@gmail.com.)

Your perspective matters! Leave a comment below and let us know what you think. We welcome diverse viewpoints and encourage respectful discussions. Don't hesitate to share your ideas or engage with others.

Search MindaNews

Share this MindaNews story
[custom_social_share]
Send us Feedback