Misa alang sa mga Kalag sa mga Namatay sa Sendong Malampuson

Misa alang sa mga Kalag sa mga Namatay sa Sendong Malapuson
Iligan Survivors Movement
2 November 2012

Malampuson nga napahigayon ang Misa paHANDUM alang samga namatay niadtong panahon sa bagyong Sendong ubos sa Hinaplanon bridge gahapon (1 Nov 2012). ang maong kalihukan gi-organisa sa Ma. Cristina Eagles Club, DXIC-RMN ug I-FM nga gitambungan usab sa mga kaparentehan ug mga higala sa mga biktima.

Ang Iligan Survivors’ Movement uban sa network niini ug mga miyembro mitambong usab sa maong kalihukan uban sa panawagang “Pray for the Sendong Victims! Pray for Justice.” Nahisubay sa Awhag Oplan HANDUM nga panawagan sa ISM ang maong pagtambong. Ang ubang mga kaubanan sa ISM mipatuman usab sa maong pagHANDUM sa tanang sementeryo niining dakbayan sa Iligan City.

Kauban sa ISM niining Awhag Oplan HANDUM 2012 mao ang Liga ng Makabagong Kabataan (LMK), Kilusang Kabataan (KK), YAPAK (Iligan Artists Collectives), Lig-on ug Hiniusang Kusog sa mga Kabus-Dakbayan (LIHUK), Electoral Reforms and Development Assistance Center (ERDAC), Mindanao Peoples’ Peace Movement (MPPM) ug ang Ranao TriPeople Movement for Genuine Peace and Dvelopment (RTMGPD).

Matud pa ni Mr Achmad Musa ang Presidente sa ISM nga “kining atong kampanya atol aning adlaw sa mga Santos ug mga Kalag pagpakita nga ang ISM nakig-duyog sa iyang mga kaubang survivors ug victims ug ang katumanan sa pagpahiluna sa mga Kalag mao man ang pagpahiluna usab sa mga buhing survivor nga nahibili pa dinhi sa kalibutan.”

Sa laing bahin, ang Liga ng Makabagong Kabataan (LMK) ilalum sa Pray for Justice nga panawagan nagkanayon usab “ang among pagpakig-uban usab niining higayona mao nga ipanawagan ang singgit alang sa hustisya sa mga biktima sa political, media ug extrajudicial killings labi na ang biktima sa Maguindanao Massacre.” Sila usab nanawagan ngadto sa lokal nga kagamhanan nga atimanon ang mga bata ug batan-on nga nabiktima sa bagyosng Sendong sama sa pagpatuman sa Educational Assistance, Health Assistance ug uban pang serbisyo alang sa maong mga sektor.

Padayon ang kampanya alang sa Katungod ug Kaayuhan sa mga Sendong Survivors. Panawagan ni Mr Musa nga unta suportahan sa katwhang Iliganon ang DIALOGUE nga gi-arrange sa ISM kauban ang Iligan City Local Government Unit pinaagi kang Mayor Lawrence Ll. Cruz ug ubang linyang ahensya.  (Max Savandal, Sendong Watch, ISM Bulletin)

Comments

comments