DAKBAYAN SA DABAW (MindaNews/15 Mayo) — Kini ang akong kasinatian isip usa ka driver.
Kaming mga driver sa pampasaherong jeep (PUJ) pirming gadali. Gadagan ang jeep gapangulikta na og pamasahe para inig kanaog diretso na ug aron di pud malangan ang uban. Di na masabtan sa ubang pasahero, unya pa motunol og pamasahe inig monaog na mao nga ang driver dili malikayan magyawyaw labi nag tibuok ang ibayad.
Sa trapik pud mangita gyud ang driver og pamaagi nga makalusot. Kahinumdum ko mga alas sais sa gabii sa Matina, GSIS dinhi sa syudad sa Davao, ang kalsada kay duha pa lang ka lanes kaniadto. Kay tungod nagdali, sa shouldering ko niagi kay bakante man. Natingala ko kay naay ni kalit og blinker. Aguy ang Suzuki Samurai man, ang sakyanan ni Mayor Rodrigo R. Duterte.
Nakita nako nga ninaog iyang mga escort gipara ko ug ang ubang jeep nga nag sunod sa akoa. Pipila ka segundo ni aksyon kog kabalaka kay si Mayor padulong na sa akoa.
Si Mayor-President Rodrigo Duterte ug si Gregorio “GG” Bueno, sa Tulunan, North Cotabato Abril 26 kadtong niadto si Mayor para sa release sa usa ka miembro sa Army nga nadakpan sa New People’s Army. Hulagway ni TOTO LOZANO
Tood man, nangutana siya nako. “Pila ka lanes ni?”
Tubag pud nako “two lanes Mayor.”
Dayong pangayu sa akong drivers license, og kay dugay man nakuha sa plastic jacket kay nipilit pag ayo, iyang gilabni, sabay sulti “ambi na dugay kaayo putang ina ihatod nang mga pasahero nimong putang ina mangamatay nang yawa mga gahi kaayo mog ulo.”
Nilakaw si Mayor padulong sa ubang jeep nga nasa likod nako. Gipanghatod nako akong mga pasahero og ni garahe nako kay di na pwede mo byahe kay wala na koy lisensya.
Sa akong pag uli, ni hapit ko sa Bangkal sa balay sa akoang igsoong babaye. Nangutana ko kung amigo sila ni Mayor. Ang iyang tubag sa ako, “dili mi amigo ni Mayor pero kumare nako iyang asawa.”
Nakulbaan ko pero gi hangyo nako akong igsoon kung pwede ko pauban niya. Nangutana siyag “ngano unsay problema?” Nisulti ko nga gidakop ko ni Mayor. Ang violation nako overtaking right side shouldering. Bawal kana.
Nibalik ko sayo sa buntag sa balay sa akong igsoong babaye. Gi hangyo nakog usab nga ubanan ko adto sa balay ni Mayor nga diha lang sa ilang subdivision, para hangyoon nga kuhaon nako akong lisensya.
Pag abot namo sa balay ni Mayor nangutana akong igsoon sa guard. “Naa si mare Beth?” Tubag sa guard “naa Ma’am sa sulod.”
“Pwede maistorya?” Gi adtoan sa guard. Taud taud nigawas si Ma’am beth ang asawa ni Mayor. Gi-saysay sa akong igsoon ang nahitabo sa akoa. Taud taud ni gawas si Mayor.
Kulbaan ko pero nangayo kog katahuran kang Mayor. “Maayong buntag Mayor.” Nangutana si Mayor unsay problema? Ni tubag ko nga, “ako tong imong gidakop gabii sa GSIS Mayor” og diha diha iya kong gi-seminar.
Gi ingnan ko, “sunod lagi mo sa balaod. Mao nang usahay tamakan ta sa taga laing nasud kay mga gahi kaayo tag ulo. Dili mosunod sa balaod abusado kaayo. Kung ang dalan two lanes subay diha ayaw pag una una para maka pamintaha sa uban.”
Nangayo kog pasaylo kang Mayor. Taud taud gi-uli akong lisensya. Pagdawat nako sabay sulti “salamat Mayor, salamat Ma’am beth” og nanguli mi sa akong igsoon nga nalipay.
Ug sa maong kasinatian akong nasabtan ang importansya sa Disiplina.
Kini nga kaagi nahitabo ni tuig 1991 pa pero wa gyud nako kalimti. After 25 years, akong ikapasigarbo nga ang Mayor nga nidakop nako, Presidente na sa Pilipinas. Si Mayor Rody Duterte.
(Si Gregorio “GG” Bueno taga MindaNews na ni sya karon).